مجبوس اللحم

[أم الزيين]

مجبوس اللحم

--------------------------------------------------------------------------------

تدروون ان اسرع طريقه لقلب الرجل بطنه
وقالو بطنه مو ان تترفسوون في بطنه لاااااااااا
قالو بطنه اي تفننو له بالطبخ
ومو تقوولو لاحقين
خله يتقدم وبعدين نطبخ له


هذه سوالفكم وما تعقلوون منها

كأني طولت صح
ندخل في طبختنا وهي
^_^ مجبوس اللحم^_^

بسم الله بدينا وعلى النبي صلينا ..
اي يابنياتي امهاتنا قبل علمونا الاكل الزين اللي ريحته خنينه وانا بعلمكم الطبخ الزين ..

شوفوا اول شي لازم تحددون العدد واليوم بنطبخ حق 5 انفار مجبوس لحم ..
يعني اللحيمه تقدرونها انتوا والعيش يكون 3 جيلات لاتصيرون بخله حطوا زايد ولا تسون سوات مرت الابو؟؟

اول شي تيبين اللحيمه وتغسلينها غسالن سنع تفركينها فرك بايدج اكثر من مره لما يصير لون الماي صافي ويطلع منها كل الزفر
بعدين تجهزون الجدر اللي بتفوحون فيه اللحيمه ..
تحطين ماي بالجدر وعليها كم عويد دارسين خشن وكمحبيبة فلفل اسود خشن
وحبيبات مسمار خشن وهيل هم خشن
وتقصين بصلتين ارباع وكم فص ثوم(حسب الرغبه) ..
ويه ادري الخدامه بتسوي كل شي ..

وتحطينهم فوق الماي لما يفوح تحطين اللحيمه بالماي ومن يفوح الماي جيبي بهار مخلوط عاد اكيد تعرفونه وتحطين منه شوية على اللحم وتنطرين لمدة ساعه وربع او اكثر على حسب نوع اللحيمه ..
وبهل الفتره تغسلين العيش طبعا غسيل العيش مايبيله شي .. تحركينه بالماي اكثر من مره لما يصفى لون الماي وبعدين تنقعينه بماي حار وفوقه ملح وتخلينه على كتر ..ماعليكم من امهاتكم ادري بقولون مايصير يتنقع العيش بماي حار قولولهم مالكم شغل..

الحين نرجع حق اللحم عقب ساعه من الفوح تحطين عليه الملح طبعا تحطين الملح شوي شوي وتذوقين طعمه
مو تسوونه مالح
مابي اقولج حطي هل كثر ملح ادري ماراح تفهمين
الحين خلص اللحم هني تشيلين اللحيمه وتحطينها بصينيه...
وتشخلين ماي اللحم من البهار وبعدين تيبين الجدر وتحطين فيه شوية ماي وتكبين فوقه العيش وخلي الماي يصير فوق العيش بشويه مو تغرقينه ويصير هريس ولا سليق..!!

وتخلينه ينشف على راحته ..ومن يبدي الماي يخف وماتشوفينه حطي حديده تحت الجدر وخليه على نار هاديه ..
الحين تروحين حق اللحم وترشينه بدارسين ناعم وهيل ناعم وتقلينه
ومن يخلص القلي تحطينه فوق العيش وتسكرين الجدر
وطبعا تكونين مزهبه الحشو والزعفران ..
الزعفران تنقعينه بماي ورد اذا كان عندج ولا ماي عادي ..وتخلينه على كتر ..

الحين نتكلم عن الحشو
الحشو يابناتي عباره عن بصل مقصص صغار ونخي ..تغسلين النخي وتفوحينه شوي او يكون منقع من فتره هذي طريقه وهذي طريقه المهم تيبين البصل وتحمصينه بجدر طبعا بدون دهن او شي ثاني
تخلينه يزل مايه وتحركينه باستمرار ومن يتلزق رشي عليه شوية ماي وتحركينه لما يقلب لونه ويصير شوي محومر ..
وبعدين تحطين البصل والنخي وتحطين فوقهم لومي سحاري ناعم وشوية فلفل اسود وشوية ملح وفي ناس يحطون شوية بهار مخلوط هم حلو وتحركينه واذا شفتيه يتلزق حطيله شوية ماي وحركيه لما ينشف الماي وهني خلص الحشو ..

شيلي الحشو وحطيه بنفس الجدر اللي فيه العيش واللحم على كتر عشان العيش ياخذ ريحة الحشو وتيبين الزعفران وترشينه فوق العيش واللحم والحشو وتسكرين الجدر عشر دقايق ونجبي وعليج بالعافيه ..

طبعا الدقوس تعرفون تسونه وماله داعي اقولكم ..